المحاضرة الاولى للدكتور حميده (شرح كتابى )

Admin عدد المساهمات : 16 تاريخ التسجيل : 04/08/2011

بسم الله الرحمن الرحيم
الزيكم ياشباب عاملين ايه
طبعا الناس كانت مشغوله فى التقديم وناس كتير مكبره دماغها والمحاضرة دى فى ناس كتير مش حضروها فانا هشرحهالكم زى مانا فهمتها من الدكتور بالظبط

ويارب يوفقنى واعرضها بشكل سهل
وتفهموهاا كويس باذن الله

-----------------------
الفصل الأول
الإطار الفكرى للمحاسبه

الفصل ده عباره عن تمهيد وعرض للمحاسبه بشكل عام يعنى بعلمك يعنى ايه محاسبه بشكل عام واهم الكلمات والمصطلحات الى بتستخدم فى المحاسبه بشكل عام
وايه اهدافها وفايدتها ايه المحاسبه ويعنى ايه وحدة اقتصادية وايه فروعها وايه الى بيتعمل فيها ومراحلها طبعا شكلك كده مش فاهم المصطلحات دى
عشان كده عملولك الفصل ده عشان يفهمك الحجات دى تابع بقى وتوكل على الله معانا

وقبل مانبدىء فى كلمه هتقابلك فى المحاسبه على طول اسمها الوحده الاقتصاديه
يعنى ايه الوحده الاقتصاديه بقى
دى معناها : شركه -مؤسسه -جمعيه - منشأه - أو ماشابه
اى حاجه تبع البيسنس يعنى
بدل مايلخبطوك ومرة يقولولك شركه ومرة يقولك مؤسسه ومرة يقولك منشأه دى كلها اسماء لاشياء تشبه الشركات فبستخدم مصطلح الوحدة الاقتصاديه

أولا / مفهوم المحاسبة وأهدافها ووظائفها

قوم هات الكتاب عشان مش هكتب النص هشرح بس فانت تقرأ الفقرة فى الكتاب وانا هشرحهالك

أولا : مفهوم المحاسبة
بيقولك فى الفقرة دى ان المحاسبة مرت بعدة مراحل قبل ان تكون نظام معلومات
يعنى زمان المحاسبه دى كانت فن اسمه فن المحاسبة
وبعد كده بفتره بقت علم اسمه علم المحاسبة
وبعد فتره بقت نظام للمعلومات
وضحت كده وهنوضحها اكتر شوف المخطط ده
المحاسبه فن ◄─ المحاسبه علم ◄─ المحاسبة نظام معلومات

كده وضحت وبقت تمام

طبعا بما ان المحاسبة علم او نظام معلومات لازم يعملولها تعريف عشان لما يالفوا كتب فيها يكتبوا التعريف عشان اى حد يقرأ التعريف يعرف ايه هيا المحاسبة وبتعمل ايه وفايدتها ايه من خلال التعريف
طبعا مش اى حد هيعرف المحاسبه
يعنى مش تتوقع طالب بالفرقه التالته ربنا كرمه ووفقه وعرف المحاسبه بمزاجه لا طبعا لازم ناس متخصصه تعرف العلم ده لذلك اول ناس عرفوا المحاسبه من زمان من سنه 1941
هو المعهد الامريكى للمحاسبين القانونيين
وعرفوا المحاسبه على انها
(( فن تسجيل وتبويب وتلخيص العمليات والاحداث ذات الطبيعه المالية بطريقه منظمة وبشكل نقدى وتفسير النتائج المترتبه عليها ))
طبعا تعريف كويس وهفسرهولك
فلنفرض ان انا أحمد مدير شركه مثلا
وانت محمد محاسب معايا فى الشركه
واحنا كل يوم بنبيع وبنشترى ونستورد ونصدر فى الشركه بتاعتنا أو المؤسسه بتاعتنا
طبعا عاوزين واحد يكتب لنا ويسجل لنا بعنا ايه واشترينا ايه وكسبنا كام وخسرنا كام انت بقى بتقوم بالعملية دى وتحسب كل حاجه الى اشتريناه والى بعناه والى كسبناه كله وتعملى تقرير بيه وتجبهولى عالمكتب
انا بطلع عليه واخد قرار بناءا عليه يعنى لاقيتنا خسرانين بسبب سلعه اقرر اننا مش نجيبها تانى ونستبدلها بحاجه تانيه أو لاقيتنا كسبانين من تصدير السلعه دى اقرر انى ازود الكمية
يبقى انا باخد قرارات بناءا على التقرير الى انت جبته وانت جبته منين عن طريق انك سجلت عمليات البيع والشراء والاستيراد والتصدير وغيرها
يبقى انت بتسجل وتبوب وتلخص (ده كله هتفهمه بعدين بالتفصيل ) المهم بس انك فهمتها انت الى بتعمل كده وبتسجل وتبوب وتلحخص فى تقارير فى الشركه عندنا
العمليات والاحداث ذات الطبيعه الماليه يعنى الشركه بتحصل فيها حجات كتير مش انت بقى قاعد عالدفتر تكتب كل الى بيحصل فى الشركه لا انت متخصص باى حاجه تتعلق بالفلوس فى الشركه
انت بتكتبها وتسجلها ملهاش علاقه باموال او نقود او فلوس الشركه ملكش دعوة بيها
يعنى مش هتكتب ان صاجبك فطر الساعه كام جنمبك فى المكتب ولو مثلا لاقيت بنت داخله الشركه الساعه 9 صباحا ولابسه لبس عجبتك تسجلها فى الدفتر انت ملكش دعوة الا بالامور الى بتختص
بالماليه او تتعلق بالفلوس زى ماقال التعريف فهمت

بطريقه منظمة وبشكل نقدى وتفسير النتائج المترتبه عليها يعنى انت بتحسب استوردنا ايه وصدرنا ايه وده بكام وده بكام وترتب على ذلك الشركه بتاعتنا كسبانه بسبب التصدير ولا لأ أو خسرانه
كده تمام
باقى التعريفات هتلاقيها سهله جدا بعد الشرح ده المهم الفكره الاساسية لكل تعريف وصلت فكل الى عاوزين يعرفوا المحاسبه بيعرفوها بشكل يخلى الى يقرا التعريف يفهم ايه هيا المحاسبه

فاصل ونعود .. lol!

Admin عدد المساهمات : 16 تاريخ التسجيل : 04/08/2011

عدنا
بعد كده بيبدأ يشرحلك ويوضحلك ان المحاسبه فى تطور وتغير مستمر على حسب تطور الاقتصاد والحياه الاقتصاديه
بمعنى كل يوم بتظهر حاجه جديده تتعلق بالتجارة والبورصه وتتعلق بالنقديه فيتم اضافتها الى المحاسبه لانها تهتم بالتعامل مع الماليه كما ذكرنا سابقا
يعنى علم متجدد ممكن تلاقى فيه حجات من 10 سنين مش كانت موجوده فى المحاسبه اصلا وده على حسب تطور الاقتصاد والبورصه الخ تتطور المحاسبه ايضا

2- هدف المحاسبة
بقولك يتمثل الهدف العام للمحاسبه فى توفير المعلومات الازمه لمساعده مستخدمى هذه المعلومات فى اتخاذ القرارات الرشيدة المتعلقه بوحده اقتصاديه معينه
يعنى ايه ؟
يعنى المحاسبه عامة ككل كده بتوفر معلومات للى بيستخدموا المعلومات دى ( وهو على سبيل المثال صاحب الشركه أو مديرها وعشان مش نتلخبط قولنا هنسميها الوحدة الاقتصادية ) والى بيتخدموا المعلومات
دول بياخدوا قرارات زى منا قولت قبل كده انى باخد قرار بناءا على اخر نتائج لاقينا الشركه او الوحدة الاقتصادية بتاعتنا خسرانه ممكن ناخد قرار بشأن كده عشان نظبط من اوضاح الوحده الاقتصاديه وهكذا ..

لكن الهدف العام الى لسا قايلينه ده مش بتحقق الا لما تتحقق عدة اهداف
مثلا شوف
هدف1+هدف2+هدف3+هدف...=الهدف العام
فهمت بقا يعنى عشان يكون الهدف العام اتحقق لازم نحقق جميع الاهداف الفرعيه كلام جميل ؟
جميل
شوف بقى ايه الاهداف الفرعيه دى :
1- قالك حصر وتسجيل العمليات الماليه التى حدثت خلال فتره زمنيه معينه داخل الوحده الاقتصاديه.
يعنى التفره الزمنيه دى غالبا بتكون سنه هنعتبرها سنه مثلا انت طول السنه تسجل بعنا ايه واشترينا ايه وبكام واستوردنا ايه وبكام وهكذا ...

2- تحديد صافى نتيجة النشاط لهذه الوحدة الاقتصادية خلال فتره زمنيه معينه وتتمثل فى الفرق بين الايرادات والمصروفات التى ساهمت فى تحقيق هذه الايرادات بمعنى بعد ماتقعد تسجل طول السنه الى احنا بعناه واشترينا واستوردناه فى الشركه
تقوم بقى تطريح الايرادات من المصروفات يعنى احنا صرفنا على البضاعه والمخازن والذى منه فلوس تمام وكسبنا من البيع والشراء والتصدير فلوس بتشوف انت كمحاسب الفرق بين الى صرفناه على البضاعه والى جانا مكسب وبكده بتحدد الربح وهو نتيجة النشاط يعنى
يعنى صرفنا 100000 عالبضاعه وكسبنا 500000 يبى انت بتحسب كسبنا كام
يبقى كده بقى
400000
تمام ياجميل

بعد كده
3- تحديد التدفقات النقديه من والى الوحدة الاقتصادية خلال هذه الفتره الزمنيه المعينه
حاجه بتتعلق بالربح والخساره برضو

4 - تحديد المركز المالى لهذه الوحدة الاقتصاديه فى نهاية هذه التفره الزمنيه .
يعنى بتحدد اننا استخدمنا قد ايه من ميزانية شركتنا عشان نربح الربح الى ربحنا ده
وفاضل قد ايه من ميزانيتنا ومواردنا او فاضل بضاعه قد ايه مش اتباعت وعلينا ديون ولا لأ وعلينا كام وهكذا إلخ ..

5- توفير المعلومات النى تساعد فى التخطيط والرقابه واتخذا القرارات المتعلقه بهذه الوحده الاقتصادية
زى ماقولنا وهى واضحه اصلا
انك بعد مابتخلص شغلك بتلخصه فى تقرير وتطلع على مدير الشركه وتديله التقرير فهو بقى ياخد قرارات بناءا على تقريرك ده شوف انت هتبقى راجل مهم الزاى بيتوقف عليك قرارات اداريه Surprised

انتهت المحاضرة الاولى
اى محاضرة تانيه انا مستعد اشرحهالكم للى مش حضرها مؤقتا
واحنا ناويين نصور المحاضرات فديو بعد كده بس لسا بنرتب مع الشباب I love you

ملحوظه هامه جدا : انا تعمدت انى امثلك الدرس فى شركه عشان تفهم هيا اسمها الوحده الاقتصادية لانها ممكن تكون مؤسسه او منشأه او زى مايكون اسمها وانا عملت ككده عشان تفهم
لان الفهم اهم حاجه مش زى زمان الى بيعلملك بيعلم من نموزج لا ده الدكتور نفسه الى بيعلملك الورقه وهيعرف اذا كن فاهم ولا لأ
وزى ماقال دكتور جمال الشوادفى ممكن يكون عندك مذاكره 90 % تعبر عنهم بشكل سىء فى ورقه الامتحان تاخد 60%
وممكن تكون عندك مذاكره 60% تعبر عنهم بشكل جيد فى ورقه الاجابة تاخد 90%
بالتوفيق ياشباب

lol!

عدد المساهمات : 2 تاريخ التسجيل : 16/10/2011

شكرا لك ياحمد على المجهود الرائع

عدد المساهمات : 1 تاريخ التسجيل : 18/10/2011

الف شكر يا باشا على مجهودك
وربنا يجعله في ميزان حسناتك !!

Admin عدد المساهمات : 16 تاريخ التسجيل : 04/08/2011

شكرا على مروركم الجميل وانتظروا باقى المحاضرات

عدد المساهمات : 1 تاريخ التسجيل : 29/09/2012

طب لو سمحتم انا كنت عايزة محضرات للرياضة
البحتة علشان مش فهمة فيها حاجة وكنت ادبى فمحتاجة المحضرات ده اوى
وشكرا على المجهوذ

» مبادىء قانون محاضرة أولى للدكتور عبد الله النجار (شرح كتابى )
» أحداث اليوم الأول للفرقه الاولى بالكليه وبالصور